Mediat njoftojnë se trajneri i ri i Real Madridit, Juande Ramos, nuk e ka në planet e tija mbrojtësin italian Fabio Cannavaro, dhe duket se aventurës së tij spanjolle i ka ardhur fundi. Sipas “Sky Sport 24”, Ramos nuk planifikon t’ia zgjasë kontratën kampionit të Botës, e cila zgjat deri në qershor të vitit të ardhshëm. Së shpejti pritet që agjenti i ish-mbrojtësit të Interit dhe Juves të takohet me drejtuesit e Los Merengues për të diskutuar planet e vazhdimit ose të përfundimit të kontratës. Fituesi i Topit të Artë për vitin 2006, muajin e kaluar kishte theksuar dëshirën e tij për të qëndruar më gjatë në Santiago Bernabeu, mirëpo ai duhet të shikojë edhe ndonjë skuadër tjetër. Skuadra e Napolit është e interesuar të fitojë shërbimet e qendërmbrojtësit italian, por paga e lartë e tij e pamundëson një transferim të tillë.
